Nehemiah 6
14. . . . (饜崁饜崅饜尠饜尶饜崋饜尨)饜崉饜尨, 饜尭饜尠饜尮饜尨饜尮 饜尭饜崅饜尠饜崋饜崈饜崉饜尮饜尦饜尨饜尦饜尶饜尳 饜尲饜尮饜尯. 15饜尵饜尠饜尫 饜尶饜崈饜崉饜尠饜尶饜尫饜尠饜尳饜尠 饜崊饜尠饜崅饜尭 饜崈饜崏 饜尡饜尠饜尶饜崅饜尣饜崈饜崊饜尠饜尦饜尦饜尵饜尶饜崈 路饜尨路 饜尵饜尠饜尫 路饜尯路 饜尦饜尠饜尣饜尠 饜尲饜尨饜尳饜崏(饜尭饜尮饜崈 饜尠饜尰饜尶饜尰饜尮饜崈), 路饜尳路 饜尦饜尠饜尣饜尨 饜尵饜尠饜尫 路饜尡路 16饜尵饜尠饜尫 饜崊饜尠饜崅饜尭, 饜崈饜崊饜尨 饜尫饜尠饜尶饜崈饜尮饜尦饜尨饜尦饜尶饜尳 饜崋饜尮饜尠饜尳饜尦饜崈 饜尶饜尳饜崈饜尠饜崅饜尠饜尮 饜尠饜尰饜尰饜尠饜尮, 饜尵饜尠饜尫 饜崏饜尫饜崉饜尨饜尦饜尶饜尳 饜尠饜尰饜尰饜崏饜崈 饜尭饜尮饜尶饜尦饜崏饜崈 饜尭饜崏饜崈 饜尡饜尮饜崈饜尶饜尳饜尵饜尠饜尳饜尨 饜尶饜尳饜崈饜尮饜崈, 饜尵饜尠饜尫 饜尠饜崉饜尦饜崅饜尠饜尶饜崈 饜尠饜尣饜尮饜崈 饜尮饜尳 饜尠饜尶(饜尣)饜崏饜尳饜尠 饜尮饜尪饜尨 饜尠饜尡饜崅饜尠饜尡饜尠; 饜尵饜尠饜尫 饜尶饜崋饜尯饜尶饜尳饜尭饜尨饜尦饜尶饜尳 饜尭饜尠饜崉饜尨饜尮 饜崋饜崅饜尠饜尲 饜尣饜尶饜尦饜尠 饜尶饜尳饜崈饜尠饜崅饜尠饜尲饜尲饜尠 饜崊饜尠饜崅饜尭 饜尶饜崈饜崋饜尶饜尰饜尰饜尮饜尭 饜尭饜尠饜崉饜尠 饜崊饜尠饜尶饜崅饜崈饜崉饜崊. 17饜尵饜尠饜尫 饜尮饜尳 饜尦饜尠饜尣饜尠饜尲 饜尵饜尠饜尮饜尳饜尠饜尮饜尲 饜尲饜尠饜尳饜尠饜尣饜尠饜尮 饜崊饜尨饜尮饜崈饜尶饜尳 饜尭饜尮饜尪饜尨 饜崅饜尨饜尮饜尯饜尵饜尠饜尳饜尨 饜尮饜尶饜尦饜尠饜尮饜尨, 饜尭饜尠饜尮饜尨饜尮 饜崈饜尠饜尳饜尦饜尮饜尦饜尨饜尦饜尶饜尳 饜尠饜尮饜崁饜尮饜崈饜崉饜尶饜尰饜尠饜尳饜崈 饜尦饜尶 饜崉饜崏饜尡饜尨饜尮饜尮饜尳, 饜尵饜尠饜尫 饜崉饜崏饜尡饜尨饜尮饜尠饜崈 饜尦饜尶 饜尮饜尲. 18饜尲饜尠饜尳饜尠饜尣饜尠饜尮 饜尠饜尶饜尯 饜尮饜尳 饜尮饜尶饜尦饜尠饜尮饜尠 饜尶饜崋饜尠饜尮饜尭饜尵饜尠饜尮 饜崊饜尨饜尮饜崈饜尶饜尳 饜尮饜尲饜尲饜尠, 饜尶饜尳饜崉饜尨 饜尲饜尨饜尣饜崈 饜崊饜尠饜崈 饜崈饜尠饜尮饜崌饜尠饜尮饜尳饜尨饜尮饜尮饜尳饜崈, 饜崈饜尶饜尳饜尠饜尶饜崈 饜尠饜尮饜尨饜尮饜崅饜尮饜尳饜崈, 饜尵饜尠饜尫 饜尮饜崏饜尠饜尳饜尠饜尳 饜崈饜尶饜尳饜尶饜崈 饜尮饜崈 饜尳饜尠饜尲 饜尦饜尠饜尶饜尫饜崉饜尠饜崅 饜尲饜尠饜尮饜崈饜尠饜尶饜尰饜尰饜尠饜尲饜尮饜崈, 饜崈饜尶饜尳饜尠饜尶饜崈 饜尡饜尠饜崅饜尠饜尯饜尨饜尮饜尮饜尳饜崈, 饜尦饜尶 饜尩饜尨饜尳饜尠饜尮. 19饜尵饜尠饜尫 饜崅饜崏饜尦饜尮饜尦饜尨饜尦饜尶饜尳 饜尦饜尶 饜尮饜尲饜尲饜尠 饜崊饜尠饜尮(饜尰饜尠) 饜尮饜尳 饜尠饜尳饜尦饜崊饜尠饜尮饜崅饜尭饜尵饜尠 饜尲饜尨饜尮饜尳饜尠饜尲饜尲饜尠, 饜尵饜尠饜尫 饜崊饜尠饜尶饜崅饜尦饜尠 饜尲饜尨饜尮饜尳饜尠 饜崈饜崁饜尮饜尰饜尰饜崏饜尦饜尨饜尦饜尶饜尳 饜尮饜尲饜尲饜尠, 饜尵饜尠饜尫 饜尠饜尮饜崁饜尮饜崈饜崉饜尶饜尰饜尠饜尳饜崈 饜尮饜尳饜崈饜尠饜尳饜尦饜尮饜尦饜尠 饜崉饜崏饜尡饜尨饜尮饜尠饜崈 饜崏饜尣饜尵饜尠饜尳 饜尲饜尮饜尯.
Copyright information for
Wulfila